Një anije ruse që u fundos në Spanjë thuhet se mbante dy reaktorë bërthamorë të destinuar për në Korenë e Veriut, ndërsa shkaku i shpërthimit mbetet mister. Fati i anijes Ursa Major, është mbuluar nga sekreti që kur u fundos në dhjetor 2024. Megjithatë, CNN raporton se mund të ketë qenë një ndërhyrje me rrezik të lartë nga fuqitë perëndimore për të parandaluar Rusinë të transferojë teknologjinë bërthamore te Koreja e Veriut. Anija u nis vetëm dy muaj pasi Kim Jong Un dërgoi trupa për të mbështetur pushtimin e Ukrainës nga Vladimir Putin. Një fluks aktivitetesh ushtarake i kohëve të fundit vetëm sa e ka thelluar misterin që rrethon anijen dhe ngarkesën e saj. Avionët amerikanë thuhet se kanë fluturuar disa herë mbi vendin ku u fundos anija gjatë vitit të kaluar. Po ashtu, një anije spiune ruse është parë pranë saj një javë pas ngjarjes. Qeveria spanjolle ka konfirmuar ndërkohë se kapiteni rus i anijes u tha hetuesve se ajo mbante "komponentë për dy reaktorë bërthamorë të ngjashëm me ata që përdoren në nëndetëse". Hetuesit kanë sugjeruar se zinxhiri i ngjarjeve që çuan në fundosje mund të ketë përfshirë një lloj të rrallë torpedoje që shpoi trupin e anijes. Incidenti ndodhi gjatë ditëve të fundit të presidencës së Joe Bidenit, kur lufta në Ukrainë po ndryshonte në favor të Moskës. Në atë kohë, zyrtarët thuhet se ishin të etur të shmangnin çdo përshkallëzim të drejtpërdrejtë me Rusinë. Në udhëtimin e saj të fundit, vladivostoku, në lindjen e largët të rusisë, rezultonte si destinacion i anijes. Ajo u nis nga Shën Petersburgu më 11 dhjetor dhe u shoqërua nga dy anije ushtarake ruse ndërsa udhëtonte në ujëra spanjolle. Anija papritmas filloi të ngadalësohej duke bërë që rojet bregdetare spanjolle të kontrollonin nëse ishte në rrezik. Ekuipazhi tha se cdo gjë ishte në rregull. Rreth 24 orë më vonë, anija ndryshoi papritur kurs dhe lëshoi një thirrje për ndihmë pak para mesnatës, duke raportuar tre shpërthime në anën e djathtë që vranë dy anëtarë të ekuipazhit. 14 anëtarët e ekuipazhit që mbijetuan u evakuuan. Menjëherë më pas, një nga anijet ruse shoqëruese urdhëroi autoritetet spanjolle të qëndronin larg dhe kërkoi që ekuipazhi të kthehej. Roja bregdetare spanjolle refuzoi dhe dërgoi një helikopter për të kërkuar të mbijetuarit. Në atë fazë, anija dukej ende e qëndrueshme dhe jo në rrezik të menjëhershëm për t'u fundosur. Megjithatë, thuhet se eskorta ruse lëshoi sinjalizues dhe pasuan katër shpërthime të tjera që e dërguan anijen në fund të detit.