Përpjekjet e Autoritetit Rrugor Shqiptar për hapjen e një anashkalimi brenda të hënës në segmentin ku është shembur rruga ekzistuese që lidh Tiranën me Juglindjen e vendit kanë dështuar me sukses. Autoriteti njoftoi se punimet për hapjen e anashkalimit në vendin e njohur si Arrat e Gurrës në fshatin Dragostunjë janë ndërprerë dhe të gjitha makineritë janë tërhequr, pasi terreni është i paqëndrueshëm. Rruga dytësore e hapur për kalim provizor ka pësuar fundosje dhe rrëshqitje toke, duke dëmtuar punimet e kryera dhe duke e bërë segmentin plotësisht të pakalueshëm, thotë ARRSH. Për arsye sigurie janë tërhequr mjetet e firmës zbatuese dhe është ndaluar qarkullimi i mjeteve, por edhe këmbësorëve. ARRSh njofton se do të kryejë një rivlerësim urgjent gjeologjik dhe teknik të terrenit, duke deklaruar se ai paraqitet tej mase i paqëndrueshëm dhe sfidues për ndërhyrje të reja. Në lidhje me qarkullimin, mbeten në fuqi udhëzimet e mëhershme, ku për automjetet e vogla sugjerohet kalimi nga aksi Gramsh-Lozhan-Maliq për në Korccë dhe Pogradec, ndërsa për kamionët dhe autobusët që lëvizin në drejtim të Maqedonisë së Veriut sugjerohet aksi nga Bllata dhe Rruga e Arbrit, ndërsa për mjetet e rënda që lëvizin drejt Greqisë këshillohet kalimi nga Gjirokastra dhe pika e kalimit kufitar të Kakavijës.