Kryeministri Edi Rama edhe njëherë reagoi për rastin e pezullimit të numrit dy të qeverisë Belinda Balluku nga ana e GJKKO, ku theksoi se ankimimin në Kushtetuese e ka bërë me qëllim ruajtjen e balancës mes pushteteve dhe se nuk ka parapavijë politike dhe as kundërvënie ndaj drejtësisë. Gjatë përmbledhjes së zhvillimeve kryesore të javës, në podkastin Flasim, kreu I qeverisë sqaroi se kjo është një betejë themelore, sipas tij, për mbrojtjen e kufijve mes pushteteve dhe për moslejimin e marrjes së kompetencave ekskluzive të kryeministrit, qeverisë dhe parlamentit nga një prokuror e një gjykates. Ky veprim, që “de jure” quhet pezullim, por “de facto” është nënshtrim brutal i ekzekutivit, sjell përditë pasoja pas pasojash. Arsyeja, pse unë i ndaj disa shembuj me publikun, është për t’u kuptuar deri në fund se çfarë ka ndodhur, çfarë po kalojmë dhe çfarë po përpiqemi dhe po përpiqem të bëj, përmes adresimit të kësaj problematike befasuese dhe të befasishme në Gjykatën Kushtetuese, dhe të ndaj, jo vetëm pasojat, por edhe dëmet që mund të bëhen të pallogaritshme. Rama për herë të parë foli dhe për drejtorin e ARRSH dhe atë të KESH që ndodhen në arrest shtëpie, po të akuzuar në dosjen Balluku.