Agjencia e Mbikëqyrjes Policore ka arrestuar në flagrancë një person, si i dyshuar për kryerjen e veprës penale “Prodhim dhe shitje e narkotikëve” e kryer në bashkëpunim. Gjithashtu është proceduar penalisht në gjendje të lirë punonjësi i policisë me gradën Nën Komisar, me detyrë Specialist në Seksionin kundër Narkotikëve në DVP Shkodër. Bëhet me dije se procedimi penal në ngarkim të tyre ka nisur pasi në datë 15 janar, shtetasi i arrestuar me kombësi siriane e shtetësi shqiptare, është konstatuar nga shërbimet e Komisariatit të Policisë Nr. 1 Tiranë duke qarkulluar me automjetin në pronësi të punonjësit të policisë. Gjatë kontrollit personal nga policia i është gjetur dhe sekuestruar në cilësinë e provës materiale një sasi lënde narkotike e dyshuar kokainë. Shtetasi sirian kishte edhe precedentë të mëparshëm kriminal. Raportohet se vijojnë hetimet për identifikimin e personave të tjerë të përfshirë, si dhe rolin e punonjësit të policisë në këtë veprimtari kriminale.