Policia e Shtetit konfirmoi arrestimin e Gerd Gjinararit, i dënuari me burgim të përjetshëm nga drejtësia shqiptare për vrasjen e Naim Zyberit, një emër i njohur i botës së krimit në Tiranë në vitet ’90. Gjinarari ishte shpallur në kërkim pasi në vitin 2019 u lirua me kusht nga Gjykata e Korçës, përmes një vendimi të dyshimtë, që u shfrytëzua nga i dënuari me burgim të përjetshëm për t’u arratisur. 52-vjeçari është shpallur fajtor për vrasjen e Naim Zyberit, ndodhur në Milano në vitin 1997. Sipas hetimeve, Gjinarari dhe Arben Grori hynë në dhomën e spitalit duke u paraqitur si të afërm të pacientit dhe realizuan ekzekutimin me armë zjarri, të cilën e kishin fshehur brenda një buqete me lule. Për këtë ngjarje, Gjinarari u dënua me burgim të përjetshëm nga gjykatat italiane dhe në vitin 2014 u ekstradua në Shqipëri për të vuajtur dënimin. Në vitin 2019, ai u lirua me kusht nga Gjykata e Korçës, vendim që shkaktoi reagime të forta dhe polemika në opinionin publik. Më pas, Gjykata e Apelit e rrëzoi vendimin e lirimit, duke urdhëruar rikthimin e tij në burg për të vuajtur pjesën e mbetur të dënimit. Pas këtij vendimi, Gjinarari nuk u paraqit për ekzekutimin e masës dhe u shpall në kërkim ndërkombëtar.