Arrestohet kryetari në detyrë i bashkisë së Himarrës, socialisti Jorgo Goro, pas kallëzimit të depozituar në SPAK nga i zgjedhuri i kësaj bashkie që qëndron pas hekurave, Fredi Beleri. Mësohet se Goro u arrestua në Dhërmi në një bar-kafë, nga agjentët e SPAK, teksa urdhër arreste janë lëshuar edhe për katër persona të tjerë. Fredi Beleri i cili prej 12 majit të vitit të kaluar ndodhet në burg për shit-blerje votash, e kallëzoi penalisht Jorgo Goron për tjetërsin prone në favor të të tretëve. Në kallëzimin e Fredi Belerit thuhet: “Mbi këtë pronë, pasi është blerë, është marrë statusi i investitorit strategjik nga shtetasi Artan Gaçi, ish-deputet i Partisë Socialiste dhe bashkëshorti i Ministres se Mbrojtjes në atë kohë, aktualisht Ministre e Punëve të Jashtme. Trashëgimtarët e shtetasit Foto Mëhilli, duke tjetërsuar një pasuri që rrjedh nga një vepër penale si ajo e falsifikimit, kanë kryer edhe veprën penale të “Pastrimit të produkteve të veprës penale” të kryer në bashkëpunim me investitorët strategjikë, shtetasin Artan Gaçi etj. Po ashtu edhe shtetasja Olta Xhaçka, aktualisht Ministre e Punëve të Jashtme, me mosveprimet e saj, duke mosdeklaruar konfliktin e interesit, ka përfituar nëpërmjet regjimit martesor të drejta pasurore dhe përfitime të paligjshme, që sipas ligjit për investitorët strategjikë si dhe ligjin për konfliktin e interesit nuk i takojnë.” Beleri paditi kryetarin në detyrë të bashkisë së Himarrës, Jorgo Goron për veprat penale ‘Shpërdorim detyre’, ‘Falsifikim i dokumenteve, Foto Pavllo Mehilli, për kryerjen e veprës "Falsifikimi i dokumenteve", "Pastrimi i produkteve te veprës penale". Artan Gaçin, për kryerjen e veprës penale "Falsifikimi i dokumenteve", dhe "Pastrimi i produkteve të veprës penale" dhe Olta Xhaçkën, për veprën penale "Shpërdorimi i detyrës".