Ish-Presidenti brazilian, Jair Bolsonaro është arrestuar të shtunën nga Policia Federale dhe është transferuar në një stacion policie. Avokati i tij konfirmoi lajmin për Reuters, por nuk dha detaje të mëtejshme lidhur me arsyet e ndalimit. Një zëdhënës i Policisë Federale tha se Bolsonaro iu nënshtrua një kontrolli mjekësor të shtunën në mëngjes. Ish-Presidenti, që ishte një figurë kryesore e krahut të djathtë në politikën braziliane, është dënua në shtator me 27 vjet e 3 muaj burg për përpjekjen e tij për të mbajtur pushtetin pas humbjes së tij në zgjedhjet e vitit 2022 kundër Presidentit Luiz Inácio Lula da Silva. Gjykata e përshkroi atë si organizatorin dhe përfituesin kryesor të një plani për të penguar inaugurimin e Lulës në vitin 2023. Ndërkohë, Bolsonaro është ende në procesin e apelimit të vendimit të Gjykatës së Lartë, dhe urdhri përfundimtar i arrestimit nuk është lëshuar ende. Për më shumë se 100 ditë, ai ka qenë nën arrest shtëpiak, i detyruar të respektojë masa të rrepta kufizuese, të lidhura me një hetim për dyshimet se ai ka tentuar të kërkojë ndërhyrjen e SHBA-së në procedurat penale kundër tij.