Një operacion policor i zhvilluar në Vlorë ka sekuestruar tre armë zjari dhe një sasi lënde eksplozive plastike. Në pranga ka rënë poseduesi i tyre një shtetas 57-vjeçar, i cili mbante të fshehura armët dhe eksplozivin, për llogari të grupeve kriminale. Operacioni u realizua në fshatin Gorrisht, Selenicë, në lagjen Rexhepaj, ku gjatë kontrollit të banesës së tij, u gjetën dhe u sekuestruan 3 armë zjarri të fshehura, si dhe një sasi lënde eksplozive plastike, e ndarë në 10 kallëpe, gati për përdorim. Pas hetimeve ka rezultuar se armët dhe lënda eksplozive plastike dyshohet të ishin fshehur nga shtetasi i arrestuar për t’u përdorur nga grupe kriminale në aktivitete të paligjshme. Nën drejtimin e Prokurorisë, hetimet vazhdojnë për të identifikuar individët e tjerë të përfshirë. Operacioni u realizua nga Sektori për Hetimin e Krimeve të Rënda dhe Seksioni për Mbështetjen Operacionale të Hetimit në policinë e Vlorës.