Në një operacion të koordinuar nga Seksioni për Hetimin e Narkotikëve, është goditur një rast i shitjes së lëndëve narkotike. Policia ka sekuestruar rreth 265 gramë kokainë, të ndarë në doza të vogla gati për shitje, si dhe një sasi kanabisi. Gjatë operacionit, u arrestua një shtetas i cili dyshohet se shiste këto lëndë narkotike në zonën e "Ish-parku i autobusave". Operacioni i koduar "Parku" është realizuar pas një hetimi që ka nisur prej disa javësh dhe përdorimit të informacioneve operative, që tregonin se i arrestuari kishte aktivitet kriminal në këtë fushë. Gjatë kontrolleve të kryera në rrugën “Frosina Plaku” dhe në banesën e tij, policia ka gjetur lëndët narkotike të llojit kokainë dhe kanabis. Materialet hetimore janë dërguar për shqyrtim në Prokurorinë e Tiranës për të vijuar më tej me veprimet procedurale.