Një aksion i beftë i forcave Operacionale në Fushë Kuqe të Kurbinit dhe në zonën e Dobraçit në Shkodër ka çuar në pranga dy persona, që policia thotë se ishin shpallur në kërkim për llogari të SPAK. Në pranga kanë rënë shtetasit Alket Xhixha, 42 vjeç, banues në Fushë Krujë dhe Elvin Merlika, 47 vjeç, banues në Mamurras. Të dy këta shtetas janë shpallur në kërkim pasi Gjykata e Posaçme ka caktuar masën e sigurisë arrest me burg për akuzat e sigurimit të kushteve dhe mjeteve për të kryer vrasje, grup të strukturuar kriminal dhe kryerja e veprave penale në kuadër të një grupi kriminal. Si rrjedhojë e këtij operacioni, policia thotë se ka sekuestruar dy armë zjarri pistoleta, dy armë gjahu, dy radio si ato të policisë, një jelek antiplumb si dhe municione luftarake. Merlika dhe Xhixha nuk janë emra të panjohur për drejtësinë. Ata dalin në dëshmitë e dhëna nga Nuredin Dumani si personazhe të rekrutuara nga Ervis Martinaj, një tjetër i kërkuar nga drejtësia, por i zhdukur prej vitit verës së vitit 2022.