Dy shtetas kanë rënë në prangat e policisë së kryeqytetit pasi shisnin lëndë narkotike kokaine dhe kanabis, në afërsi të një shkolle. Pas hetimeve u zbulua se dy autorët e fshihnin drogën në ambientet e një lavazhi në përdorim nga njëri prej tyre. Sakaq është proceduar penalisht një shtetas 19 vjeç, pasi gjatë kontrollit fizik iu gjet një sasi lëndë kanabis, që dyshohet se ia kishte blerë njërit prej të arrestuarve. Gjatë kontrollit fizik ndaj shtetasve të arrestuar si dhe kontrollit në ambientet e lavazhit dhe të banesës së njërit prej tyre shërbimet e Policisë gjetën dhe sekuestruan 220 doza kanabisi, 20 doza kokaine, 1 armë të ftohtë thikë, shuma parash të përfituara nga shitja e lëndës narkotike, 2 peshore elektronike dhe 2 celularë. Operacioni u zhvillua nga komisariati i Policisë numër 3, për parandalimin, evidentimin dhe goditjen e veprimtarisë kriminale në fushën e narkotikëve.