Ervin Salianji është deputeti i parë demokrat i cili merr hapin e bashkimit real edhe në seli. Krahas bashkimit në mbledhjet e përbashkëta të grupit parlamentar dhe aksionin në seancat e Kuvendit apo komisionet parlamentare, Ervin Salianji tashmë publikisht bëri të ditur vendimin e tij për tu rikthyer në seli. Sipas Salianjit, vendimi i tij vjen si hap kundër qeverisë, që për deputetin demokrat po tenton në të gjitha mënyra përçarjen e demokratëve dhe krijimin e një vendi njëpartiak. Ervin Salianji ka qenë një prej deputetëve më të afërt me Lulzim Bashën, por njëherësh ishte edhe ndër kritikët e tij të parë, që pas humbjes në zgjedhjet e pjesshme të 6 marsit, kërkoi dorëheqjen e tij. Nga ana tjetër, pas rezultatit në po ato zgjedhje Salianji zbuti tonet ndaj Berishës, teksa ishte edhe një prej deputetëve më aktivë në fushatën e 14 majit. Të bashkuar demokratët arritën të rimerrnin bashkinë e Kavajës, një bastion që drejtohej prej partisë socialiste. Teksa Salianji është deputeti i parë që rikthehet në selinë e PD, mbetet për tu parë se çfarë do të sjellë janari, teksa burime nga Partia Demokratike bëjnë me dije se do të ketë zhvillime të rëndësishme në kampin opozitar, referuar edhe bashkimit.