Kryeministri i Kosovës, Albin Kurti, njoftoi të shtunën se disa persona janë arrestuar si të dyshuar me sulmin. Ai tha dhe se janë gjetur prova materiale në lidhje me shpërthimin e ndodhur në kanalin e ujit të Ibër-Lepencit në veri të vendit. “Që ta shohim vendin e ngjarjes, dëmin e jashtëzakonshëm që na është shkaktuar mbrëmë nga ky sulm terroristë e kriminal, që ka dëmtuar infrastrukturën kritike, meqenëse e ka dëmtuar rënd edhe prodhimin e energjisë elektrike, edhe furnizimin me ujë. Vetëm duke iu falënderuar punës vetmohuese të këtyre policëve, punëtorëve, inxhinierëve, ekspertëve, kemi arritur që deri diku ta sanojmë dëmin, ndonëse jemi diku tek çereku i prurjeve normale të ujit nëpërmjet kanalit Iber Lepenc, i cili e bën edhe ftohjen e termocentraleve në Obiliq, edhe furnizimin me ujë të shumë komunave, përfshirë edhe Prishtinës. Policia po i zhvillon hetimet, ka kryer bastisje, ka edhe arrestime, dëshmi e prova materiale dhe të gjithë këta kriminel e terroristë do të përballën me drejtësinë, me fuqinë e ligjit të drejt të republikës demokratike e të pavarur të Kosovës”, tha ai. Teksa pa nga afër vendin ku ndodhi sulmi, kreu I qeverisë sqaroi për gazetarët se qeveria nuk është kundër serbëve por është Serbia ajo që është kundër Kosovës. ai kërkoi reagim nga ana e ndërkombëtarëve. Kërkojmë nga faktorët ndërkombëtar, sidomos Brukseli dhe Uashingtoni që ta dënojnë Beogradin dhe të kërkojnë përgjegjësi ndaj tyre. Nuk është e rastësishme heshtja e presidentit të Serbisë, nuk është e rastësishme që ata po presin sa është dëmi, sa na kanë destabilizuar në mënyrë që të shikojnë çfarë epizodash tjerë të organizojnë Gjatë vizitës kurti u shoqrua nga ministri brendshëm Xhelal Sveçla, por dhe drejtues të tjerë të policisë.