Një prej 3 autorëve të vrasjes së politkanit serb në Kosovë, Oliver Ivanoviç, është arratisur nga vendi. Bëhet fjalë për Marko Roshiç, I cili u dënua me vendim të gjykatës me 8 vite burg, por që ky vendim nuk u ekzekutua dot, për shkak se personi në fjalë nuk u gjet në shtëpi. Lajmin e ka konfirmuar zëvendësdrejtori i policisë për rajonin e veriut, Veton Elshani. “Ditën kur është marrë vendimi ka qenë diku rreth orës 11:00. Neve na kanë sjellur vendimin për ekzekutimin e dënimit rreth orës 15:00. Po atë ditë (ditën kur është marrë vendimi nga gjykata), ne kemi shkuar për ta arrestuar por ai s’ka qenë në shtëpi dhe ne besojmë se ai nuk është në Kosovë”, është shprehur Elshani. Kujtojmë se Marko Roshiç u dënua për “pjesëmarrje ose organizim i grupit kriminal” lidhur me “vrasje të rëndë, i dënuar me 8 vite burg dhe 10 mijë euro gjobë, teksa momentin e shpalljes së vendimit në seancë nuk ka qenë asnjë prej të akuzuarve. Ndërkohë policia e Kosovës ka komunikuar edhe me partnerët, për rastin, duke shpallur e shpallur atë në kërkim.