Mijëra rusë vazhdojnë të përpiqen të largohen nga vendi ndërsa radhë trafiku 20 kilometra të gjata janë krijuar në kufirin mes Rusisë dhe Gjeorgjisë dhe tani duken edhe nga hapësira. Të hënën një oficer rekrutimi u qëllua nga një i ri i cili refuzoi të nisej në luftë, në mesin e përpjekjes së Putinit për të dërguar 300 mijë ushtarë shtesë në vijën e frontit në Ukrainë pas shpalljes së mobilizimit të pjesshëm të trupave ruse. E kjo ndodh ndërsa mijëra rusë të tjerë protestojnë kundër politikës së re brutale të Putinit për të ndihmuar pushtimin e tij të përgjakshëm të Ukrainës. Imazhe satelitore nga Maxar Technologies tregojnë një radhë automjetesh që largohen nga rusia, në kufirin me gjeorgjinë, që shtrihet për rreth 20 kilometra. Vetë rusët kanë thënë për mediat se kanë pritur nga 40 deri në 50 orë për të kaluar kufirin. Imazhe të ngjashme radhësh të stërgjata janë parë edhe në kufirin mes mongolisë dhe rusisë. Ndërkohë sipas shërbimeve ruse të sigurisë, FSB, 260 mijë burra janë larguar deri më tani nga vendi me qëllim që të evitojnë thirrjen nën armë. Një burim i kremlinit konfirmoi për mediat se ka një raport të FSB-së që nënvizon se 261 mijë burra janë larguar nga Rusia nga e mërkura deri mbrëmjen e të shtunës. Sidoqoftë, numri mund të jetë shumë më i lartë sepse të dhënat vonojnë të raportohen deri në instancat më të larta. Dhe një situatë e tillë mund të cojë në përpjekje të forcës së sigurisë dhe ministrisë së mbrojtjes për të bindur Putinin të mbyllë kufijtë dalës para se të bëhet vonë. Madje të hënën pati edhe raporte se ushtria ruse ka dërguar mjete të blinduara në një pikë kufitare në kufirin me gjeorgjinë. Po të hënën u raportua edhe se mbi 8 mijë rusë u larguan drejt finlandës. Një urdhër nga kremlini për mbylljen e kufijve, nuk është lëshuar ende.