Rusia të mërkurën njoftoi se kishte nisur fazën e tretë të stërvitjeve për përdorimin e armëve bërthamore taktike, ku përfshihen forcat e angazhuara në konfliktin në Ukrainë. Ministria e Mbrojtjes tha se stërvitjet po zhvilloheshin në rajonet ushtarake qendrore dhe jugore, që përfshijnë disa republika të Kaukazit të Veriut dhe Krimenë e aneksuar, si dhe katër rajone të Ukrainës jugore dhe lindore që Rusia pretendon se i ka aneksuar pavarësisht se nuk i kontrollon plotësisht. Distrikti ushtarak jugor përfshin qytetin rus të Rostov-on-Don, ku edhe ndodhet shtabi qendror i Moskës për operacionin ushtarak në Ukrainë. “Faza e tretë e stërvitjeve të forcave bërthamore jostrategjike ka filluar”, tha ministria ruse e mbrojtjes në një deklaratë. Kjo fazë e stërvitjeve përfshin trajnimin mbi sistemet raketore Iskander-M dhe avionë të ndryshëm, tha ministria ruse e mbrojtjes. Personeli ushtarak që do të marrë pjesë do të stërvitet për marrjen e "municioneve speciale" dhe për pajisjen e sistemeve raketore dhe avionëve. Presidenti Vladimir Putin në fillim të majit urdhëroi organizimin e këtyre stërvitjeve pjesërisht, sipas Kremlinit, në përgjigje të kërcënimeve të perceptuara nga vendet perëndimore, veçanërisht pasi Presidenti francez Emmanuel Macron hapi mundësinë e dërgimit të trupave franceze në Ukrainë. Faza e parë e stërvitjeve filloi në maj. Që nga fillimi i armiqësive në shkurt 2022, Putini ka evokuar disa herë përdorimin e mundshëm të armëve bërthamore. Në verën e vitit 2023, Rusia vendosi armë taktike bërthamore në aleatin e saj Bjellorusi, e cila gjithashtu kufizohet me Ukrainën. Minsku në maj njoftoi gjithashtu stërvitje të sinkronizuara ushtarake së bashku me Moskën për të verifikuar lëshuesit e saj taktikë të armëve bërthamore.