Zyrtari i lartë amerikan, Michael McCaul, tha të hënën se porositë e Tajvanit janë rrugës dhe se lojërat kineze që u ngjajnë luftërave, e kanë rritur nevojën për të forcuar kapacitetet e këtij ishulli në fushën e mbrojtjes. Kina e konsideron Tajvanin, ishull që, si pjesë të saj dhe është zotuar se do ta fitojë kontrollin e tij edhe përmes forcës, nëse është nevoja. Qeveria e Tajvanit, në anën tjetër, hedh poshtë pretendimet e Pekinit për ishullin. Në dy vjetët e fundit, Tajvani është ankuar për vonesa në ardhjen e armëve amerikane, si raketat Stinger, për shkak se prodhuesit amerikanë janë duke furnizuar Ukrainën. McCaul, udhëheqësi i Komitetit të Dhomës së Përfaqësuesve për Marrëdhënie me Jashtë, ka thënë se ushtria e Kinës u ka dërguar Shteteve të Bashkuara një mesazh të fuqishëm javën e kaluar. “Ne po çojmë përpara punën sa u përket sistemeve të armëve. Do të doja të shihja punë më të shpejtë, mirëpo armët po vijnë”, u tha McCaul gazetarëve në Taipei, pas takimit me presidentin e Tajvanit, Lai Ching-te. Ai tha se Tajvanit i duhen mjaftueshëm armë, në mënyrë që presidenti kinez, Xi Jinping të kuptojë që rreziqet e pushtimit të ishullit i tejkalojnë përfitimet. “Presidenti Lai dhe unë, si gjithmonë, kemi pasur bisedime shumë direkte për kërcënimin me të cilin përballet ishulli prej fqinjit të tij verior”, tha McCaul. Pa mbrojtje të fuqishme, Xi Jinping ka ambicie shumë agresive”. Kina e ka sanksionuar McCaul-in vitin e kaluar, pas një vizite që ai realizoi në Tajvan, për t’u takuar me zyrtarë të lartë atje.