Raketa balistike Oreshnik me rreze të mesme veprimi, për të cilën Vladimir Putin është mburrur kohët e fundit, mund të largojë nevojën për të përdorur armë bërthamore, tha presidenti rus. "Ajo që na duhet tani nuk është të përmirësojmë doktrinën bërthamore, por na duhen më shumë "Oreshnik", sepse këto sisteme moderne të armëve na vendosin në prag të eliminimit praktikisht të nevojës për të përdorur armë bërthamore," tha ai të martën në Kremlin. Putini i referohej Oreshnikut me aftësi bërthamore që Rusia lëshoi mbi qytetin ukrainas Dnipro, më 21 nëntor. Bazuar në raketën balistike ndërkontinentale RS-26 Rubezh, raketa e re thuhet se mban gjashtë koka luftarake konvencionale dhe ka një rreze veprimi deri në 5 mijë kilometra. Putini është mburrur me shpejtësinë e saj, që është 10 herë më e madhe se ajo e zërit, ose 10 Mach, cka e bën imune ndaj çdo sistemi të mbrojtjes raketore. Ai ka thënë gjithashtu se arma është aq e fuqishme saqë edhe raketat e pajisura me koka luftarake konvencionale mund të jenë po aq shkatërruese sa një sulm bërthamor dhe mund të shkatërrojë madje edhe bunkerët nëntokësorë. Përdorimi i saj në Dnipro ngriti alarmin mbi synimet e Moskës për armët bërthamore, sepse përkoi me zyrtarizimin e doktrinës së re bërthamore të Rusisë nga Putini, e cila uli pragun për përdorimin e armëve jokonvencionale. Ai po ashtu erdhi disa ditë pasi administrata Biden zemëroi Moskën duke lejuar Ukrainën të përdorë ATACMS me rreze më të gjatë veprimi brenda territorit rus.