Presidenti i Polonisë andrzej Duda ka shkaktuar jo pak bujë këto ditë pasi tha se vendi i tij është i gatshëm të presë në territorin e vet armët bërthamore të aleatëve të NATO-s. Por sipas ekspertëve armë të tilla nuk mund të vendosen në Poloni në një të ardhme të afërt. Sipas presidentit Duda, Polonia është e gatshme ti presë këto armë për të frikësuar Rusinë. Nëse aleatët e NATO-s e kërkojnë këtë, Polonia mund të forcojë në këtë mënyrë krahun lindor të aleancës, tha Duda në një intervistë për gazetën "Fakt”. Rusia "ka nisur të stacionojë kohët e fundit armët e saj bërthamore në Bjellorusi," tha Duda, duke iu referuar një njoftimi të bërë në dhjetor nga presidenti bjellorus Aleksander Lukashenko. Nëse aleatët e NATO-s do të marrin vendim për të vendosur armë bërthamore në territorin tonë për të forcuar krahun lindor të NATO-s, ne jemi gati, tha Duda, duke shtuar se Polonia është e vetëdijshme për detyrimet e saj brenda aleancës ushtarake. Kryeministri polak Donald Tusk u tha gazetarëve se duhet të bisedojë urgjentisht për këtë propozimi me presidentin Duda, sepse "kjo ide është shumë serioze dhe ai duhet të dijë të gjitha rrethanat që e shtynë Presidentin ta bëjë këtë deklaratë."