Sulmet vdekjeprurëse ajrore izraelite dhe një sulm me mortaja nga Hezbollahu kanë rritur frikën se armëpushimi në Liban mund të shkërmoqet. Dhjetë persona u vranë në Libanin jugor të hënën në mbrëmje, tha ministria e shëndetësisë, pasi Izraeli kreu valën e tij më të madhe të sulmeve ajrore që kur të dyja palët ranë dakord javën e kaluar për t'i dhënë fund konfliktit 13 mujor. Ushtria izraelite tha se goditi luftëtarët e Hezbollahut, raketalëshuesit dhe infrastrukturën dhe u kërkoi autoriteteve libaneze të parandalonin atë që e quajti "aktivitet armiqësor" të grupit. Hezbollahu më herët kishte lëshuar dy mortaja mbi një bazë të ushtrisë izraelite në një zonë të diskutueshme kufitare, duke thënë se ato ishin një paralajmërim për atë që e shihte si "shkelje të përsëritur" nga Izraeli. Nuk raportohet për viktima. SHBA, që bashkë me Francën ndërmjetësuan marrëveshjen dhe po monitorojnë respektimin e saj, thanë se "në një masë të madhe" armëpushimi po zbatohej pavarësisht rasteve. Sipas marrëveshjes, Hezbollahut i janë dhënë 60 ditë kohë për t'i dhënë fund pranisë së tij të armatosur midis Linjës Blu, kufiri jozyrtar midis Libanit dhe Izraelit, dhe lumit Litani, rreth 30 km në veri. Forcat izraelite në anën tjetër duhet të tërhiqen nga zona gjatë të njëjtës periudhë dhe trupat e ushtrisë libaneze dhe paqeruajtësit e OKB-së do të vendosen atje. Ministri izraelit i mbrojtjes, Israel Katz, paralajmëroi ndërkohë të martën se nëse armëpushimi bie, izraeli do të hyjë më thellë në liban dhe nuk do të bëjë më dallime mes ushtrisë libaneze dhe hezbollahut. "Nëse i kthehemi luftës, do të veprojmë me forcë më të madhe dhe do të depërtojmë më thellë. Dhe atëherë nuk do të ketë imunitet për shtetin e Libanit," tha ai gjatë një vizite në kufirin verior të Izraelit, duke shtuar se "deri më tani tel-avivi ka bërë një dallim mes Libanit dhe Hezbollahut, por nuk do të jetë më kështu”.