Njoftimi për armëpushimin mes SHBA-së dhe Iranit u prit me lehtësim në vendet e Gjirit, por qetësia zgjati shumë pak. Mungesa e një afati të qartë për hyrjen në fuqi të marrëveshjes u reflektua menjëherë në terren, ku sulmet nuk u ndalën. Të mërkurën në mëngjes, Emiratet e Bashkuara Arabe dhe Bahreini raportuan sulme të reja iraniane. Në Abu Dhabi, një goditje ndaj një kompleksi gazit shkaktoi zjarre dhe ndërprerje të prodhimit, ndërsa disa persona mbetën të plagosur lehtë. Ndërkohë, në Doha dhe Dubai u aktivizuan alarmet ajrore, ndërsa shpërthime dhe aktivitet i shtuar i avionëve luftarakë u raportuan gjatë gjithë mëngjesit. Në Bahrein, sirenat detyruan banorët të evakuoheshin sërish, pas një serie sulmesh që vijuan edhe pas shpalljes së armëpushimit. Situata mbetet e paqëndrueshme, pasi edhe në Teheran u dëgjuan aktivizime të mbrojtjes ajrore. Zhvillimet tregojnë se, pavarësisht marrëveshjes, tensionet në rajon vijojnë dhe armëpushimi mbetet ende i brishtë.