Presidenti i SHBA-së, Donald Trump, ka thënë se armëpushimi njëmujor midis SHBA-së dhe Iranit është në “grahmat e fundit” të jetës. Ai u tha gazetarëve në Zyrën Ovale se, ndërsa armëpushimi mbetet në fuqi, ai është "jashtëzakonisht i dobët". Ai u tha gazetarëve: "Do të thoja se armëpushimi po mbahet në jetë artificialisht dhe ka afërsisht 1 përqind shanse për të jetuar'". Presidenti amerikan tha se udhëheqësit e Iranit ishin "njerëz shumë të pandershëm", duke shtuar: "Më është dashur të merrem me ta katër ose pesë herë, ata ndryshojnë mendje". "Atë copë mbeturinë që na dërguan, as nuk e mbarova së lexuari", tha ai. Trump gjithashtu akuzoi Iranin se po tërhiqej nga një marrëveshje për të lejuar SHBA-në të largonte furnizimin e tij me uranium të pasuruar. Ai këmbënguli se Irani "nuk do të ketë kurrë një armë bërthamore". CNN shkruan ndërkohë se Trump është bërë gjithnjë e më i frustruar me mënyrën se si iranianët po i trajtojnë negociatat për t'i dhënë fund luftës, dhe disa ndihmës të tij thonë se ai tani po e shqyrton seriozisht një rifillim të operacioneve të mëdha luftarake. Trump është bërë i paduruar me mbylljen e Ngushticës së Hormuzit, si dhe me atë që ai e percepton si përçarje në udhëheqjen iraniane që po i pengon ata të bëjnë lëshime të konsiderueshme në bisedimet bërthamore, thanë burime të njohura me diskutimet. Përgjigja e fundit nga Irani, të cilën Trump e ka konsideruar si "krejtësisht të papranueshme" dhe "budallallëk", ka bërë që disa zyrtarë të vënë në pikëpyetje nëse Teherani është i gatshëm të marrë një pozicion serioz negociues. Ka kampe të ndryshme brenda administratës që po rekomandojnë rrugë alternative, thanë burimet. Disa, përfshirë zyrtarët në Pentagon, kanë argumentuar për një qasje më agresive për të ushtruar presion mbi iranianët në tryezën e bisedimeve, duke përfshirë sulme të shënjestruara që dobësojnë më tej pozicionin e Teheranit. Të tjerë, megjithatë, ende po bëjnë presion për t'i dhënë diplomacisë një shans tjetër, thanë burimet.