Presidenti amerikan, Donald Trump, tha se armëpushimi në Gaza nuk është në rrezik, pasi Izraeli kreu sulme në enklavën palestineze, duke vrarë të paktën 50 persona, në përgjigje të vrasjes së një ushtari izraelit. Avionët izraelitë goditën Gazën më 28 tetor pasi Izraeli e akuzoi Hamasin se ka shkelur armëpushimin e ndërmjetësuar nga Trumpi tre javë më parë. Agjencia për mbrojtje civile në Gaza tha për agjencinë AFP të mërkurën se të paktën 50 persona u vranë gjatë sulmeve izraelite. Sipas kësaj agjencie, 22 nga viktimat ishin fëmijë, por edhe gra dhe të moshuar dhe afro 200 të tjerë u plagosën. “Siç e kuptova, ata vranë një ushtar izraelit”, tha Trump për gazetarët në bordin e avionit presidencial. “Pra, izraelitët u kundërpërgjigjën dhe ata duhet të kundërpërgjigjen. Kur diçka e tillë ndodh, ata duhet të kundërpërgjigjen”, shtoi ai.