Shtetet e Bashkuara dhe Bashkimi Evropian me aleatë kanë bërë thirrje për një armëpushim të përkohshëm në Liban, pas përshkallëzimit të luftimeve mes Izraelit dhe Hezbollahut. Blloku prej 12 shteteve kërkoi ndërprerje të menjëhershme 21-ditore të luftimeve, në mënyrë që të “mundësohet hapësirë drejt një zgjidhjeje diplomatike” dhe një armëpushimi në Rripin e Gazës. Në një komunikatë të përbashkët, këto vende thanë se luftimet janë të “patolerueshme” dhe se ato paraqesin “rrezik të papranueshëm për një përshkallëzim rajonal”, i cili nuk është në interes të popullit të Izraelit e as të Libanit. Kjo kërkesë vjen një ditë pasi ushtria izraelite tha se bombardimet ndaj shënjestrave të Hezbollahut mund ta hapin rrugën për një ofensivë tokësore në Liban. Deklarata e përbashkët u nënshkrua nga SHBA-ja, Australia, Kanadaja, Bashkimi Evropian, Franca, Gjermania, Italia, Japonia, Arabia Saudite, Emiratet e Bashkuara Arabe, Britania e Madhe dhe Katari. SHBA-ja shpreson se armëpushimi i përkohshëm mund të çojë drejt stabilitetit afatgjatë përgjatë kufirit mes Izraelit dhe Libanit. Dhjetëra mijëra njerëz janë detyruar të shpërngulen nga shtëpitë e tyre si pasojë e luftimeve mes Izraelit dhe Hezbollahut, të cilat u përshkallëzuan javën e kaluar duke nxitur frikën për një luftë të gjerë në Lindjen e Mesme. Më shumë se 600 njerëz janë vrarë në Liban nga e hëna, kur Izraeli filloi bombardimet e pareshtura për ta shkatërruar atë që e quajti infrastrukturë të ndërtuar nga Hezbollahu prej luftës së fundit mes tyre më 2006. Rreth 90.000 njerëz në Liban janë zhvendosur vetëm këtë javë, sipas OKB-së. Rreth 40.000 të tjerë jetojnë në shatorre nëpër vend. Zyrtarët amerikanë kanë thënë se synojnë ta përdorin armëpushimin trejavor për t’i rifilluar bisedimet e ngecura për një armëpushim mes Izraelit dhe Hamasit, si dhe për lirimin e pengjeve.