Vendet e Bashkimit Evropian kanë miratuar zyrtarisht një plan për të përdorur fitimet nga aktivet e bankës qendrore ruse të ngrira në BE, për mbrojtjen e Ukrainës, tha të martën qeveria belge. Marrëveshja në fakt kishte nevojë vetëm për një vulë, nga ministrat, pasi ambasadorët e BE arritën dakordësi më herët, në fillim të muajit. Sipas marrëveshjes, 90% e të ardhurave do të shkojnë në një fond të menaxhuar nga BE për ndihmën ushtarake për Ukrainën, ndërsa 10% do të shkopjë për të mbështetur Kievin në mënyra të tjera. BE pret që aktivet të sjellin rreth 15 deri në 20 miliardë euro fitime deri në vitin 2027. Ukraina pritet të marrë këstin e parë në korrik, thanë diplomatët e BE. Grupi i Shtatë vendeve më të industrializuara të botës, G7, ngriu rreth 300 miliardë dollarë asete financiare ruse menjëherë pas pushtimit të Ukrainës nga Moska në 2022. Që atëherë, BE-ja dhe vendet e tjera të G7-ës kanë debatuar se si dhe nëse do të përdorin fondet për të ndihmuar Ukrainën. Sekretarja e Thesarit në SHBA, Janet Yellen, po i shtyn ndërkohë vendet e tjera të G7-ës që edhe ato të bien dakord për një plan për të përdorur fitimet nga paratë e bllokuara ruse, si kolateral për të mbështetur një kredi më të madhe për të ndihmuar Ukrainën.