Presidenti amerikan, Donald Trump tha se Shtetet e Bashkuara janë duke dërguar armë në Ukrainë përmes NATO-s, një javë pasi Pentagoni bëri të ditur që do të ndalojë së dërguari disa armë në vendin e goditur nga lufta e Rusisë. Trump tha se do të bëjë një “deklarim të madh” për Rusinë më 14 korrik. Ai nuk ka dhënë më shumë hollësi në këtë aspekt, por ka folur për dërgimin e armëve. “Po i dërgojmë armë NATO-s, dhe NATO-ja po paguan për këto armë 100%. Pra, çfarë po bëjmë është që armët që po nisen, po shkojnë në NATO, dhe më pas NATO-ja do t’i dorëzojë këto armë në Ukrainë dhe NATO-ja do të paguajë për këto armë”, i tha Trump në një intervistë transmetuesit amerikan NBC. Më herët gjatë javës, Trump tha se do të kërkojë nisjen e disa armëve mbrojtëse për Ukrainën, pas komenteve negative të disa anëtarëve të Kongresit rreth njoftimit të Pentagonit, më 2 korrik, që armatimet do të ndalen, pas shqetësimeve se rezervat amerikane kanë rënë në mënyrë të konsiderueshme. Trump duket se e përmbysi këtë vendim më 8 korrik, kur tha se Shtetet e Bashkuara do të dërgojnë armë për mbrojtjen e Ukrainës, ndërsa sulmet ruse po intensifikohen. Ai, gjithashtu, është shprehur i zemëruar me presidentin rus, Vladimir Putin, duke thënë se po shqyrton mundësinë e vendosjes së sanksioneve të reja ndaj Moskës. Trump tha se po studion propozimin e senatorëve Lindsey Graham dhe Richard Blumenthal për vendosjen e sanksioneve dhe tarifave ndaj shteteve që mbështesin luftën e Rusisë, dhe masa tjera ndëshkuese për sistemin bankar të Rusisë. “Besoj se do të bëj një deklarim të madh për Rusinë të hënën”, tha Trump gjatë intervistës. Presidenti ukrainas, Volodymyr Zelensky u ka bërë thirrje aleatëve që të përdorin “asetet ruse” për rindërtim të Ukrainës dhe ka kërkuar më shumë armë, investime dhe prodhim të përbashkët të armëve për mbrojtje.