Policia e Kosovës gjatë dy ditëve të shkuara me aksione të ndryshme në veri të Kosovës në komunën e Zubin Potokut dhe atë të Zveçanit, ka gjetur sasi të konsiderueshme armatimi dhe pajisje tjera ushtarake. Policia njoftoi, se aksioni u zhvillua për të dyshuarin e identifikuar me iniciale S.M, që po kërkohet lidhur me një laborator droge. Por në vendin ku dyshohej se gjendej ai, u gjetën armatime. Ky rast sipas policisë ka të bëjë "me një person me interes, që dyshohet të jetë i lidhur me rastin Banjska”, rast ky i shtatorit të vitit të shkuar ku nga grupe serbësh të armatosur u vra një polic i Kosovës. "I dyshuari nuk u gjet në vendin ku dyshohej se mund të ishte, por në pronën e tij në mal, janë gjetur uniforma dhe pajisje tjera ushtarake, pjesë të pushkëve të gjata, jelekë taktikë, maska gazi, një tytë pistolete, pranga dhe 1.471 fishekë të kalibrave të ndryshëm”, thuhet në njoftimin e policisë. Në veri të Kosovës muajve të fundit policia kanë njoftuar për gjetjen dhe shkatërrimin edhe të disa laboratorëve të drogës si edhe për shumë armatime në vendndodhje të ndryshme. Ministri i Punëve të Bredshme, Xhelal Sveçla, në një reagim të tij, tha se armët që po gjenden në veri "nuk janë thjesht mbetje të bandave kriminale e terroriste, por edhe vendstrehim i armëve për planifikimet e tyre të errëta". "Si Qeveri e Republikës së Kosovës bashkë me Policinë e Kosovës dhe të gjitha institucionet tjera jemi të përcaktuar qartë që rendi juridik e kushtetues, sovraniteti e integriteti, rendi dhe ligji, liria, barazia e drejtësia do të mbizotërojnë gjithandej shtetit tonë", shkroi Sveçla në Facebook, duke shfaqur edhe foto dhe video gjatë aksionit të policisë.