Pëllumb Dervishi 46 vjec, u arrestua nga policia e Tiranës këtë të martë, në kuadër të operacionit policor të koduar "Kryqëzimi", për goditjen e veprimtarisë kriminale në fushën e armëmbajtjes pa leje. Ky shtetas, u ndalua për veprën penale "Mbajtja pa leje dhe prodhimi i armëve, armëve shpërthyese dhe i municionit". Policia bëri me dije se 46 vjecari u ndalua në rrugën "Altin Basha”. Gjatë kontrollit të kryer në automjetin e tij, policia gjeti dhe sekuestroi një armë zjarri pistoletë. Kontrollet vijuan edhe në baneën e Dervishit, ku në vendbanimin e tij efektivët gjetën një armë zjarri kallashnikov, një pushkë sportive dhe municion luftarak, të cilat u sekuestruan në cilësinë e provës materiale, së bashku me automjetin. Materialet hetimore i kaluan Prokurorisë pranë Gjykatës së Shkallës së Parë Tiranë, për veprime të mëtejshme. Ndërkohë, vijon puna e policisë për parandalimin dhe goditjen e veprimtarisë kriminale në fushën e armëmbajtjes pa leje, dhe jo vetëm.