Shërbimet e Komisariatit të Policisë Nr.2. kanë konstatuar gjatë verifikimeve për evidentimin dhe ndëshkimin e krimeve kundër mjedisit, se 15 lavazhe në territorin në juridiksion të këtij komisariati keqmenaxhonin shkarkimin e ujërave të toksikuar nga solucionet e pastrimit, duke i derdhur ato në rrugë dhe në hapësira publike. 15 aktivitetet do të bllokohen deri në marrjen e lejes mjedisore. Policia njofton se ka nisur procedimi penal për 15 administratorët e këtyre subjekteve për veprën penale “Ndotja e ajrit, e ujërave dhe e tokës”. Gjithashtu, shërbimet e Policisë iu kanë dërguar shkresa institucioneve kompetente, për marrjen e masave administrative të nevojshme. Shërbimet e Komisariatit numër 3, kanë konstatuar gjatë patrullimeve, se në zonën ‘Don Bosko’, vijonin punimet për ndërtimin e një objekti (për biznes) punime të cilat ishin ndërprerë më parë, për shkak se ishte evidentuar se kryheshin pa leje. Në vijim të veprimeve procedurale për rastin u arrestua për veprën penale “Ndërtimi i paligjshëm”, admnistratori i aktivitetit, shtetasi B. Ll., 24 vjeç, i cili i proceduar më parë, për të njëjtën vepër dhe për të njëjtin rast. Materialet procedurale iu referuan Prokurorisë së Tiranës, për veprime të mëtejshme.