Presidenti rus Vladimir Putin tha në një intervistë të transmetuar të dielën se nevoja për të përdorur armë bërthamore në Ukrainë nuk kishte lindur ende dhe se ai shpresonte që të mos lindte. Në një fragment të një interviste për televizionin shtetëror rus të publikuar në Telegram, Putin tha se Rusia ka forcën dhe mjetet për ta çuar konfliktin në Ukrainë në një "përfundim logjik". Duke iu përgjigjur një pyetjeje në lidhje me sulmet ukrainase ndaj Rusisë nga një gazetar i televizionit shtetëror, Putin tha: "Nuk ka pasur nevojë për të përdorur armë bërthamore ... dhe shpresoj që ato nuk do të jenë të nevojshme. Ne kemi forcë dhe mjete të mjaftueshme për ta çuar atë që filloi në vitin 2022 në një përfundim logjik me rezultatin që kërkon Rusia", tha ai. Putin në shkurt 2022 urdhëroi dhjetëra mijëra trupa ruse të hyjnë në Ukrainë, në atë që Kremlini e quan një "operacion ushtarak special" kundër fqinjit të saj. Megjithëse trupat ruse u zmbrapsën nga Kievi, forcat e Moskës aktualisht kontrollojnë rreth 20% të Ukrainës, duke përfshirë pjesën më të madhe të jugut dhe lindjes. Putini ka shprehur gatishmërinë e tij për të negociuar një zgjidhje paqësore në javët e fundit, pasi Presidenti i SHBA-së, Donald Trump, ka thënë se dëshiron t’i japë fund konfliktit me mjete diplomatike. Frika nga përshkallëzimi bërthamor ka qenë një faktor në qasjen e zyrtarëve amerikanë që kur Rusia pushtoi Ukrainën në fillim të vitit 2022. Ish-drejtori i CIA-s, Ëilliam Burns, ka thënë se ekzistonte një rrezik real në fund të vitit 2022 që Rusia të mund të përdorte armë bërthamore kundër Ukrainës.