Rusia akuzoi të mërkurën Britaninë për përdorimin e korridorit të drithit të Detit të Zi për dërgimin e armëve në Ukrainë, pasi mohoi akuzat e Londrës se sulmet ruse në portet ukrainase kishin ndërprerë furnizimet e rëndësishme me grurë për vendet e tjera. Kryeministri britanik Keir Starmer tha javën e kaluar se një rritje e sulmeve ruse në portet e Ukrainës në Detin e Zi po vononte ndihmën jetike që arrinte te palestinezët dhe po ndalonte furnizimet e rëndësishme të grurit drejt atij që quhet jugu global. Kombet e Bashkuara thanë javën e kaluar se sulmet ruse në portet ukrainase të Detit të Zi kishin dëmtuar gjashtë anije civile si dhe infrastrukturën e grurit që nga 1 shtatori, duke e quajtur rritjen e sulmeve "shqetësuese". Zëdhënësja e Ministrisë së Jashtme ruse, Maria Zakharova tha të mërkurën ndërkohë se pretendimet e Starmer se Moska po dëmtonte sigurinë globale të ushqimit me sulme të tilla ishin të pavenda. "Një zemërim i tillë i pabazë por i zhurmshëm nga Londra konfirmon edhe një herë pikërisht të kundërtën: përfshirjen e drejtpërdrejtë të Mbretërisë së Bashkuar në furnizimin me armë për regjimin e Kievit duke përdorur korridorin e Detit të Zi," tha ajo në një konferencë për shtyp. Zakharova iu referua atyre që tha se ishin prova më të fundit video, që tregonin portin Yuzhny, në rajonin e Odesës në Ukrainë, dhe furnizimet e supozuara të armëve, video këto të publikuara nga Ministria e Mbrojtjes e Rusisë. Ukraina është një prodhuese e madhe globale e grurit dhe misrit dhe eksportonte rreth gjashtë milionë tonë drithë në muaj përmes Detit të Zi përpara se Rusia ta sulmonte në vitin 2022. Vendi krijoi një korridor detar në Detin e Zi pas skadimit vitin e kaluar të një nisme të eksportit të grurit, të mbështetur nga OKB-ja në Detin e Zi, që përfshinte edhe Rusinë dhe që kishte mundësuar kalimin e sigurt të anijeve me grurë.