SHBA-të kanë konfirmuar për herë të parë se kanë vendosur një armë hapësinore në orbitën e Tokës, duke pranuar publikisht se zotërojnë aftësi sulmuese në hapësirë. Sekretari i Forcave Ajrore amerikane, Troy Meink, tha se arma është e nevojshme për të mbrojtur forcat amerikane nga veprimet armiqësore, por nuk dha detaje se për çfarë sistemi bëhet fjalë apo kur është vendosur në orbitë. Zyrtarët amerikanë thanë se aftësitë mund të përdoren si për mbrojtje, ashtu edhe për sulm ndaj mjeteve hapësinore të kundërshtarit. Ekspertët thonë se bëhet fjalë për një teknologji që mund të variojë nga sistemet e luftës elektronike dhe bllokimit të komunikimeve, deri te armët kinetike që mund të shkatërrojnë satelitë. Këto të fundit konsiderohen më pak të mundshme për shkak të mbetjeve që do të krijonin në orbitë.