Presidenti amerikan Donald Trump ka lëshuar një paralajmërim të ashpër për Iranin, duke thënë se SHBA-të janë gati të sulmojnë nëse është e nevojshme. Duke folur në bordin e Air Force One, Presidenti tha se SHBA-të kishin vendosur fuqi të madhe ushtarake në rajon. "Ne kemi një armatë. Dhe ndoshta nuk do të na duhet ta përdorim. Do ta shohim." tha Trump. Në një koment të veçantë, ai shtoi: "Ne kemi një flotë të madhe që po shkon në atë drejtim dhe do të shohim se çfarë do të ndodhë. Kemi një forcë të madhe që po shkon drejt Iranit. Do të preferoja të mos shihja të ndodhte asgjë, por unë kaq mund të them: po i vëzhgojmë nga afër". Këto komente vijnë ndërsa regjimi islamik i Iranit vazhdon shtypjen e dhunshme ndaj demonstruesve, me forcat e sigurisë që vrasin mijëra protestues pas javësh trazira në të gjithë vendin. Në një moment, Lindja e Mesme ishte përgatitur për sulme të mundshme amerikane në Iran pasi Trump u premtoi protestuesve se "ndihma është rrugës". Megjithatë, Shtëpia e Bardhë u zbut pasi Ministri i Jashtëm i Iranit, Abbas Araqchi, njoftoi: "Nuk ka asnjë plan për varje, varja është jashtë diskutimit". Trump u tërhoq menjëherë pas kësaj, duke thënë se kishte marrë garanci se "vrasjet në Iran po ndalen". Por pavarësisht kësaj, burime iraniane kanë paralajmëruar se mijëra të burgosur janë ende në rrezik. Sipas tyre, regjimi iranian po blen kohë duke gënjyer Trumpin dhe do të bëjë cfarë të dojë sapo ai të humbasë fokusin.