Ushtarët britanikë kanë testuar me sukses një armë të re, me frekuenca radio, e projektuar për të kryer sulme ndaj një numri të madh dronësh, tha qeveria e Mbretërisë së Bashkuar. Bota ka parë ritmet e shpejta të zhvillimit të dronëve në luftën në Ukrainë, duke ndryshuar mënyrën se si ushtritë moderne do t’i luftojnë luftërat në vazhdim. Ndërsa teknologjia e dronëve përmirësohet, e njëjta gjë po ndodh edhe me sistemet dhe teknikat kundër dronëve të dizajnuara për të rrëzuar mjetet ajrore pa pilot. Taktikat e sulmit me tufa dronësh përfshijnë përdorimin e një numri të madh mjetesh të tilla kundër mbrojtjes. Pilotët e dronëve nuk janë mësuar ende me këtë lloj sulmi, por me gjasë teknika do të bëhet gjithnjë e më e zakonshme. Inteligjenca britanike ka vlerësuar se Ukraina është përballur me më shumë se 18,000 dronë sulmues në vitin 2024. Raketat e shtrenjta të mbrojtjes ajrore nuk mund të mbrojnë vazhdimisht përballë sulmeve masive me dronë të lirë, që do të thotë se opsionet e tjera që janë më pak të kushtueshme janë gjithnjë më tërheqëse. Ministria britanike e Mbrojtjes tha se ushtarët britanikë kishin përdorur një "armë të padukshme me valë radio" për të rrëzuar një mori dronësh për të parën herë. Është një lloj arme me energji të drejtuar, ku valët e radios me frekuencë të lartë bëjnë kërdinë në pjesët kritike të një droni, duke i bërë ata të mos funksionojnë ose të dalin nga kursi dhe të rrëzohen.