Një ditë pas nxjerrjes së trupit të 33-vjeçarit Arjan Sala, i propozur tashmë për titullin “Dëshmor i Atdheut”, ekspertiza paraprake ka zbuluar se zjarri është ndezur për shkak të një shkëndije elektrike në kabllin e një llampe neoni. Mësohet se shkëndijat e ndezura pas defektit kanë rënë mbi disa rroba sintetike duke hapur flakë të shumta. Këto janë konstatur rreth orës 15:00, teksa disa punëtorë ishin duke pritur kamionin e mbushur me mallra. Në fillim kanë qenë punonjësit e sigurisë, mes tyre edhe 33-vjeçari Sala, që kanë hyrë për të shuar flakët. Ata ia dolën të shuanin flakët fillimisht por jo vatrën dhe për pasojë, zjarri u riaktivizua disa minuta më pas. Arjan Sala ishte personi që hyri në brendësi të magazinës për të shuar flakët dhe tentoi të dilte nga dera e emergjencës, por errësira dhe tymi e penguan dhe ai është rrëzuar.