Çmimi i arit u rrit përtej 5,000 dollarëve për ons për herë të parë të dielën vonë, ndërsa investitorët nxituan drejt asetit të sigurt ndërsa u përhap shqetësimi se Presidenti i SHBA-së Donald Trump po përmbys marrëdhëniet me aleatët kryesorë, nga Evropa në Kanadaja. Në 26 ditët e para të këtij viti, çmimi i arit është rritur me 15%; një rritje historike që pason një vit rekord në 2025, kur çmimet u rritën me 65%, rritja më e madhe vjetore që nga viti 1979. Ari shpesh shihet si një strehë në kohë të pasigurta dhe një barometër i ankthit të tregut. Dhe kjo rritje e fundit është nxitur nga një sërë lëvizjesh globale dhe vendase që destabilizojnë tregun nga presidenti amerikan Donald Trump, që nga kërcënimet me tarifa tashmë të revokuara kundër aleatëve të NATO-s mbi Groenlandën, e deri te operacioni ushtarak kundër Venezuelës dhe hetimi penal ndaj Kryetarit të Rezervës Federale Jerome Poëell. Kërkesa është nxitur gjithashtu nga një dollar amerikan më i dobët, inflacioni më i lartë se sa pritej, parashikimet se rezerva federale do të ulë më tej normat e interesit këtë vit dhe blerja e metalit të çmuar nga bankat qendrore në të gjithë botën. Ari u rrit me 1.4% të dielën duke shkuar në 5,058 dollarë për ons. Nërsa argjendi, një tjetër aset i sigurt që po rritet në vlerë, shënoi 4.5% rritje duke shkuar në 107.8 dollarë për ons të dielën. Pavarësisht se arriti pikën referuese prej 5,000 dollarësh, analistët mbetën kryesisht optimistë për arin, duke argumentuar se çmimet mund të rriten më tej ndërsa pasiguria vazhdon.