Administrata Trump njoftoi të enjten se ka miratuar një shitje të mundshme shumë-miliarda dollarëshe të avionëve luftarakë F-35 te Arabia Saudite, duke forcuar kapacitetet ushtarake të aleatit të saj në Gjirin Persik në mes të kërcënimit të një lufte në zgjerim e sipër në Lindjen e Mesme. Departamenti Amerikan i Shtetit njoftoi propozimin për shitjen e avionëve luftarakë "Lightning II Joint Strike Fighter" dhe pajisjeve përkatëse, me një vlerë prej 24.3 miliardë dollarësh, sipas një deklarate të Departamentit të Shtetit të enjten. Arabia Saudite kërkoi të blinte 48 avionë luftarakë me aftësi konvencionale ngritjeje dhe uljeje, si dhe 49 motorë Pratt & Ëhitney F135-PË-100, thuhej në deklaratë. "Kjo shitje e propozuar do të mbështesë objektivat e politikës së jashtme dhe të sigurisë kombëtare të Shteteve të Bashkuara, duke përmirësuar sigurinë e një aleati të rëndësishëm jashtë NATO-s, i cili është një forcë për stabilitetin politik dhe përparimin ekonomik në rajonin e Gjirit," shtoi departamenti. Nëse prodhimi dhe dorëzimi finalizohen, Arabia Saudite do të bëhej vendi i dytë në Lindjen e Mesme që përdor avionët luftarakë të avancuar të teknologjisë "stealth" (të padukshëm për radarët), pas Izraelit – duke ndryshuar potencialisht ekuilibrin e fuqisë ushtarake në rajon, një pretendim që qeveria amerikane e mohon. Sipas politikës amerikane, Uashingtoni është i detyruar të sigurojë që Izraeli të ruajë një "epërsi ushtarake cilësore", duke garantuar praktikisht se ai merr armë amerikane më të avancuara sesa shtetet e tjera arabe të rajonit. Arabia Saudite ka kohë që shfaq interes për avionin luftarak të Lockheed Martin, duke i bërë një kërkesë të drejtpërdrejtë për këta avionë Presidentit Donald Trump në fillim të vitit 2025. SHBA ka miratuar ndërkohë një paketë armatimesh me vlerë afro 142 miliardë dollarë për mbretërinë; një marrëveshje që Shtëpia e Bardhë e përshkroi si "marrëveshjen më të madhe të bashkëpunimit në fushën e mbrojtjes" në historinë e saj.