Huthit e Jemenit njoftuan se kishin sulmuar me raketa dhe dronë objekte "të ndjeshme" në kryeqytetin saudit, Riad, vetëm pak orë pasi flakë dhe një shtëllungë e madhe tymi u panë pranë aeroportit kryesor të qytetit. Arabia Saudite kishte lëshuar alarme gjatë natës për rrezik të mundshëm rreth Riadit, në mes të një përshkallëzimi të sulmeve nga Huthit brenda mbretërisë. Video dhe foto në mediat sociale tregonin një kolonë gjigante tymi të zi që ngrihej në zonë, me autostradën e aeroportit, ndërtesën kryesore të terminalit dhe objekte të tjera në plan të parë. Në një moment shiheshin edhe flakë që ngriheshin pas atyre që dukeshin si depozita karburanti. Ndërsa Huthit, të mbështetur nga Irani, kanë kryer sulme të përsëritura ndaj Arabisë Saudite që nga muaji korrik, pretendimi i fundit dukej se ishte goditja e parë e raportuar ndaj Riadit që nga fillimi i përshkallëzimit aktual. Huthit nuk specifikuan se çfarë kishin shënjestruar në Riad, por thanë se kishin sulmuar gjithashtu një objekt të kompanisë Aramco në qytetin Yanbu buzë Detit të Kuq, një nyje kyçe për eksportin e naftës saudite. Ata thanë se operacioni ishte një përgjigje ndaj një sulmi në kryeqytetin e Jemenit, Sanaa. Koalicioni ushtarak i udhëhequr nga Arabia Saudite, që lufton kundër Huthive, njoftoi se mbrojtja e tij ajrore kishte shkatërruar një raketë të lëshuar nga grupi jemenas drejt Riadit të shtunën.