Presidenti i SHBA-së, Donald Trump, tha se kishte anuluar një valë të dytë sulmesh ndaj Venezuelës pas bashkëpunimit nga kombi i Amerikës së Jugut. Presidenti tha të premten se Venezuela po lironte një numër të madh të të burgosurve politikë si shenjë e "kërkimit të paqes", pas operacionit dramatik ushtarak amerikan të javës së kaluar që rezultoi në kapjen e Presidentit Nicolas Maduro. "Ky është një gjest shumë i rëndësishëm dhe i zgjuar. SHBA-të dhe Venezuela po punojnë mirë së bashku, veçanërisht sa i përket rindërtimit, në një formë shumë më të madhe, më të mirë dhe më moderne, të infrastrukturës së tyre të naftës dhe gazit", tha Trump në Truth Social. "Për shkak të këtij bashkëpunimi, kam anuluar Valën e dytë të Sulmeve të planifikuara më parë, që duket se nuk do të jetë e nevojshme, megjithatë, të gjitha anijet do të qëndrojnë në vend për qëllime sigurie", shtoi ai. Komentet e Trump vijnë disa orë pasi ai tregoi në një intervistë në programin "Hannity" të Fox Neës se udhëheqësja e opozitës venezueliane Maria Corina Machado do të vinte në Uashington javën e ardhshme, pasi më parë kishte hedhur poshtë idenë e bashkëpunimit me të, duke thënë se "ajo nuk ka mbështetje ose respekt brenda vendit". Megjithatë, presidenti republikan i kishte thënë Neë York Times të mërkurën se SHBA-të "po shkojnë shumë mirë" me qeverinë venezueliane, të udhëhequr nga presidentja e përkohshme në detyrë Delcy Rodriguez. Gjatë intervistës në Fox Neës, Trump tha gjithashtu se do të takohej me drejtuesit e naftës në Shtëpinë e Bardhë të premten dhe se kompanitë e naftës do të shpenzonin të paktën 100 miliardë dollarë në Venezuelë.