Një shtetas britanik, 22 vjeç, është vënë në pranga nga autoritetet franceze, pasi tentoi të organizonte një dasmë të rreme me një vajzë të mitur, 9 vjeç, në Disneyland Paris, raporton AFP. Sipas The Guardian, ceremonia e ogranizuar ku I riu britanik do të ishte ‘dhëndri’ do të zhvillohej gjatë mëngjesit të datës 21 qershor, para kalasë së Hirushes në parkun gjigant. Parku ishte marrë me qira për atë që supozohej të ishte një dasmë e vërtetë private, përpara orarit të hapjes. Sipas mediave të huaja, ka qenë stafi i Disneylandit që kanë njoftuar policinë, pasi vunë re se ajo që kishte veshur fustanin e nusërisë, ishte një vajzë e mitur. Gjithashtu, sipas The Guardian, autoritetet zbuluan se “të ftuarit” në dasmë ishin aktorë të punësuar, të cilët ishin sjellë me autobus në park dhe kishin marrë pak informacion për eventin. Pasi policia hetoi, zyra e prokurorit lokal në Meaux tha se ngjarja nuk ishte një ceremoni e vërtetë martese.