Nevoja e një procesi gjithëpërfshirës për ngritjen e komisioni antikorrupsion që do të duhet të trajtojë problemet e mirqënies, sundimit të ligjit dhe luftës ndaj korrupsionit mbetet kërkesë kryesore e Delegacionit të Bashkimit Europian në Tiranë. Në një reagim për Top Channel, delegacioni i BE shprehet se është thelbësore që të jetë arrihet një mbështetje ndërpartiake, ndërsa thekson se nuk duhet të ketë kthim pas të reformës në drejtësi, të 2016. “Konsultimet kuptimplotë dhe gjithëpërfshirëse janë po aq të nevojshme sa gjithnjë, duke marrë parasysh rëndësinë thelbësore të çështjeve të trajtuara nga kjo nismë. Do të jetë thelbësore të arrihet një mbështetje ndërpartiake. Siç e kemi thënë më parë: Nisma duhet të bazohet në arritjet e mëparshme të reformës dhe të jetë në përputhje me parimin kushtetues të kontrollit dhe balancimit, me gjetjet e raporteve të shqyrtimit analitik të legjislacionit dhe me angazhimet në kuadër të procesit të anëtarësimit në BE.”, theksohet në reagim. Për sa i përket sektorit të drejtësisë, BE vërenë se parimi kryesor duhet të jetë pakthyeshmëria e reformës në drejtësi të vitit 2016.”Theksojmë se është me rëndësi jetike që procesi parlamentar i propozuar të jetë i bazuar në prova, të jetë transparent, të gëzojë mbështetje të fortë ndërpartiake dhe të mbështetet në një konsultim gjithëpërfshirës dhe kuptimplotë me të gjitha institucionet dhe palët e interesuara, duke përfshirë edhe shoqërinë civile”, nënvizon delegacioni I BE.