Pas përfundimit të shkarkimit dhe skanimit të 102 kontejnerëve me mbetje të dyshuara toksike, anija turke “Moliva” është larguar nga porti i Durrësit dhe është nisur drejt portit italian Gioia Tauro, ku do të vazhdojë normalisht aktivitetin e saj transportues. Operacioni i koordinuar i autoriteteve shqiptare i dha fund qëndrimit të gjatë të anijes në Shqipëri. Gjatë kësaj kohe kontenjerët iu nënshtruan disa procedurave të hollësishme sigurie dhe kontrolli. Ndërkohë ngarkesa me mbetje u depozitua në venddepozitimin e krijuar në kohë rekord në periferi të qytetit bregdetar, në Spitallë, në afërsi të EkoParkut, rrugës për në Sektorin Rinia. Venddepozitimi i sapokrijuar ku ndodhen rreth 2100 mbetje të metalurgjikut është nën administrimin e Agjencisë Administrimit të Pasurive të Sekuestruara dhe të Konfiskuara dhe nën monitorim të plotë të kamerave dhe policisë dhe prokurorisë. Anija turke “Moliva” me 2100 ton mbetje të dyshuara toksike mbërriti të premten e nëntorit tetorit në portin e Durrësit. Kontenjerët me mbetje të rrezikshme u kthyen në Shqipëri, nga ku u nisën verën e këtij viti. Megjithatë anija kishte disa ditë që kishte mbërritur në Durrës, konkretisht më 28 tetor, por për shkak të kërkesës së prokurorisë për të siguruar kushtet e sigurisë, anija me mbetjet e refuzuar nga autoritetet tajlandeze ishtë lënë në radën e jashtme të portit detar.