Dy anglezë të tjerë kanë rënë në pranga në Dhërmi, pasi u kapën nga Policia duke shpërndarë doza të drogërave ët forta. Policia e Vlorës zhvilloi aksionin e koduar “Parts 6”, pas informacioneve të marra në rrugë operacionale dhe arriti të vërë në pranga shtetasit Gustav Schoeman dhe Reece Banks, përkatësisht 38 dhe 28 vjeç, të dy banues në Londër. Anglezët kishin ardhur si turistë në Dhërmi dhe ishin sistemuar në një nga hotelet e zonës, teksa gjatë kontrollit, në ambientet ku ishin akomoduar, u gjetën edhe 37 doza të drogës së fortë GHB, të cilat u sekuestruan në cilësinë e provës materiale, bashkë me dy aparate celularë. Policia kishte marrë të dhëna nga inteligjenca informative mbi aktivitetin e anglezëve, që në bashkëpunim me njëri-tjetrin, shisnin drogërat e rënda te turistët, në lokalete natës dhe vende të tjera argëtimi përgjatë bregdetit. Kujtojmë që edhe të dielën e kaluar, në Dhërmi u arrestuan dy shtetas anglezë, të cilët gjithashtu shpërndanin drogëra të ndryshme për turistët në lokale. Atëherë krahas dozave të drogëz, policia arriti të sekuestrojë aparate celularë dhe një sasi të konsiderueshme parash, të ardhura nga trafiku në zonë.