Gjykata e Durrësit liron nga qelia një nga anëtarët e bandës së Avdylajve, të arrestuar në tetor të vitit 2018 gjatë operacionit të koduar Volvo 4. Dy vjet më parë, një grup personash mes të cilëve edhe Saimir Gjepali u arrestuan me bujë, por këtë të enjte gjykata e ka lënë atë me masën e sigurimit persona detyrim paraqitje. Saimir Gjepali njihet edhe për kërcënim të një gardiani burgu, por as kjo nuk e ka bindur gjykatën të jetë më e shtrënguar në rivlerësimin e masës së sigurisë, pas tejkalimit të afateve hetimore. Gjepali së bashku me anëtarët e tjerë të grupi Avdylaj dhe bashkëpuntorë u arrestua në tetor të 2018, ku u goditën 4 grupe kriminale për laboratorin e heroinës në Has. Por, pavarësisht akuzës së ngritur ndaj tyre për trafik droge, banda që njihet tashmë me emrin e Avdylajve ka dalë edhe në përgjimet për shitje-blerje votash dhe mban numrin 339 si dosje penale, hetimet për të cilën ende nuk janë mbyllur përfundimisht.