Komisioni Evropian ka miratuar një paketë financiare për Malin e Zi, me vlerë prej gati 3.2 miliardë eurosh, duke u konsideruar një vendim I rëndësishëm për përgatitje konkrete financiare për anëtarësimin në bllok. Pas miratimit të paketës financiare, presidentja e Komisionit Evropian, Ursula von der Leyen deklaroi se ky është një hap konkret drejt së ardhmes së Malit të Zi në Union. Diplomatja tha se kjo paketë përfaqëson përmbushjen e angazhimeve të Bashkimit Evropian, ndërsa Mali i Zi duhet të vazhdojë zbatimin e reformave në rrugën drejt anëtarësimit. Sipas Komisionit Evropian, qëllimi i paketës është ta përgatisë Malin e Zi për pjesëmarrje të plotë në buxhetin dhe politikat e Bashkimit Evropian. Mali i Zi do të mund të përfitojë nga fondet evropiane njësoj si shtetet e tjera anëtare, ndërsa, në të njëjtën kohë, do të nisë të kontribuojë në buxhetin e përbashkët të BE-së.