Një ditë pas anëtarësimit të Shqipërisë në tregun unik të pagesave në euro, ambasadori i Bashkimit Europian në Tiranë, Silvio Gonzato u takua me guvernatorin e Bankës së Shqipërisë, Gent Sejko. Twitter Gonzato: “Teksa Shqipëria iu bashkua tregut unik të pagesave në euro, u takova me Guvernatorin e Bankës së Shqipërisë, Gent Sejko. E përgëzova për angazhimin e Bankës për avancimin e aplikimit të Shqipërisë në SEPA, i cili u miratua zyrtarisht dje nga Këshilli Europian i Pagesave. Ky moment historik do t'i afrojë qytetarët dhe bizneset shqiptare me tregun e vetëm të BE-së, duke mundësuar një proces që gradualisht do të sillte transaksione më të lira dhe më të shpejta me BE-në. Gjithashtu diskutuam për rolin e rëndësishëm të Bankës së Shqipërisë në ruajtjen e qëndrueshme të ekonomisë së vendit. Pavarësia e Bankës është thelbësore për të kryer këtë përgjegjësi në mënyrë efektive.” – shprehet ambasadori Gonzato në Twitter. Guvernatori falënderoi diplomatin Gonzato për asistencën teknike që BE ka dhënë për forcimin e kapaciteteve të Bankës së Shqipërisë nëpërmjet fondeve IPA dhe programeve Tëinning, në fusha të rëndësishme të bankingut qendror si stabiliteti makroekonomik dhe financiar, auditimi, mbikëqyrja dhe sistemet e pagesave, në mbështetje të përgatitjeve të saj për anëtarësimin në Sistemin Evropian të Bankave Qendrore dhe më pas në Eurosistem.