Presidenti ukrainas Volodymyr Zelenski tha në një samit të BE-së se e ardhmja e Evropës po formësohej nga mbrojtja e Ukrainës dhe garancia më e mirë e sigurisë për të ardhmen e bllokut do të ishte dhënia e anëtarësimit të shpejtë për Kievin. Zelenski u tha shteteve anëtare se Ukraina dëshironte që lufta kundër Rusisë të mbaronte deri në fund të vitit dhe i nxiti ato të ndihmonin Kievin të përgatitej për një dimër tjetër me raketa dhe mbrojtje ajrore. Çdo komb demokratik në Evropë meriton të jetë në BE dhe "Ukraina e meriton këtë sepse ka paguar më shumë se çdo vend tjetër për të drejtën e saj për të qenë e lirë, e pavarur dhe evropiane", tha Zelenski. "E ardhmja e Evropës - e lirë, e bashkuar dhe sigurisht në paqe - po vendoset në mbrojtjen tonë. Kjo tregon se sa unike është situata jonë." Orë më parë, sulmet ajrore ukrainase goditën objektiva thellë brenda Rusisë, përfshirë një rafineri nafte në Moskë, sulmet e fundit me rreze të gjatë veprimi në një fushatë që Zelenski e theksoi si provë të aftësive të Ukrainës në takimet me Presidentin e SHBA-së Donald Trump dhe udhëheqës të tjerë të G7 në Francë këtë javë. Në mesazhin e tij drejtuar udhëheqësve të BE-së, ai pranoi se jo të gjithë anëtarët do të mbështesnin një anëtarësim të përshpejtuar. Ambasadorët e BE-së ranë dakord javën e kaluar të cojnë përpara bisedimet e anëtarësimit me Ukrainën dhe Moldavinë ish-sovjetike, me diskutimet që fillojnë mbi të parin nga gjashtë "grupe" ligjore dhe politike për të sjellë legjislacionin dhe standardet në përputhje me bllokun.