Amsterdami ka ndaluar hyrjen e krocerave në qendër pasi ato nuk ishin në përputhje me ambicjet e qytetit për mbrojtjen e ambjentit. Për këtë shkak, do të mbyllet terminali i krocerave, afër stacionit kryesor të trenave, që është edhe një pikë strategjike për turistët. Anijet e stërmëdha me turistë, ishin bërë një problem, me më shumë se 100 ankorime cdo vit dhe me një ndotje të lartë atmosferike. Një studim i 2021, ka treguar se në një ditë, një anije e dimensioneve të mëdha, prodhon të njëjtat nivele të dioksidit të azotit me ato që prodhohen nga 30 mijë kamionë. Amsterdami është angazhuar prej kohësh për një plan të eleminimit të emetimeve për të gjithë trafikun dhe transportin në qytet. Por, problemi i ndotjes është i lidhur ngushtë edhe me turizmin masiv. Qyteti i Amsterdamit, tërheq më shumë se një milionë persona cdo muaj dhe është përballur me vështirësi të shumta në menaxhimin e numrit të madh të vizitorëve. Autoritetet kanë nisur prej kohësh të marrin masa për kontrollin e fenomenit, dhe ndër këto masa janë ndalimi i tymosjes së kanabisit nëpër rrugët e lagjes me drita të kuqe.