Amerikanët zgjodhën Presidentin Donald Trump me shpresën se ai do të luftonte inflacionin dhe do të nxiste ekonominë amerikane, por ndërsa po i afrohet ditës së 100-të në detyrë, ata po i japin republikanëve nota të dobëta për trajtimin e të dy këtyre aspekteve, tregon një sondazh i ri i Reuters/Ipsos. Trump e ka nisur mandatin e tij me një axhendë agresive ekonomike, duke ndezur luftëra tregtare teksa ai vendos tarifa ndaj partnerëve kryesorë tregtarë të SHBA-së, duke u përpjekur të ushtrojë presion ndaj Rezervës Federale që të përkulet ndaj vullnetit të tij dhe duke çuar në rënien më të konsiderueshme të tregjeve financiare që nga muajt e parë të pandemisë së COVID-it pesë vjet më parë. Vetëm 37% e të anketuarve në sondazhin gjashtë-ditor që përfundoi të hënën miratojnë trajtimin e ekonomisë nga Trump, nga 42% që ishte kjo shifër në orët pas inaugurimit të tij më 20 janar, kur ai premtoi se do të ngrinte ekonominë dhe do të sillte një "Epokë të Artë të Amerikës". Shifra është shumë më e ulët se në çdo moment në mandatin e tij të parë. Në një sondazh të Reuters/Ipsos të kryer menjëherë pas inaugurimit të Trump, rreth 55% e të anketuarve thanë se ose inflacioni ose ekonomia më e gjerë duhet të jenë fokusi kryesor i Trump në 100 ditët e para të tij në detyrë, të cilat zgjasin deri më 30 prill. Njëzet e tre përqind zgjodhën imigracionin. Tre muaj më vonë, tre të katërtat e të anketuarve në sondazhin e fundit të Reuters/Ipsos thanë se ishin të shqetësuar se po afrohej një recesion. Pesëdhjetë e gjashtë përqind e të anketuarve, përfshirë një në katër republikanë, thanë se lëvizjet e Trumpit për të tronditur ekonominë janë "shumë të çrregullta". Dy të tretat e të anketuarve ishin të shqetësuar për tregun e aksioneve, ku çmimet kanë rënë ndjeshëm në javët e fundit mes shqetësimeve të investitorëve për planet e Trumpit për të rritur tarifat për mallrat e importuara dhe presionin mbi kryetarin e Rezervës Federale, Jerome Poëell.