Vlerësimi i miratimit të Presidentit Donald Trump mbeti në nivelin më të ulët të mandatit të tij në ditët e fundit, pasi shumë amerikanë vunë në dyshim temperamentin e tij gjatë luftës në Iran dhe një grindjeje me Papa Leonin, zbuloi një sondazh i Reuters dhe Ipsos. Sondazhi gjashtëditor i opinionit publik, i përfunduar të hënën, tregoi se vetëm 36% e amerikanëve miratojnë performancën e punës së Trumpit, shifër kjo e pandryshuar nga një muaj më parë. Trump gëzonte vlerësimin më të lartë të miratimit të mandatit të tij aktual, 47%, menjëherë pasi bëri betimin në detyrë më 20 janar 2025. Trump ka qenë nën presion që kur administrata e tij dhe Izraeli nisën një luftë kundër Iranit në shkurt, e cila ka rritur ndjeshëm çmimet e naftës. Rreth 36% e amerikanëve miratojnë sulmet ushtarake amerikane kundër Iranit, tregon sondazhi në të cilin u pyetën 4557 të rritur në të gjithë SHBA-në. Sondazhi tregoi se shumë amerikanë, përfshirë disa anëtarë të Partisë Republikane të Trump, kanë shqetësime në lidhje me temperamentin dhe mprehtësinë mendore të presidentit 79-vjeçar pas një serie shpërthimesh të tij. Vetëm 26% e amerikanëve thanë se e konsiderojnë Trumpin "të qetë". Trump ka reaguar në forma të ndryshme javët e fundit, duke lëshuar kërcënime në mediat sociale për të zhdukur qytetërimin e Iranit, duke sulmuar Papa Leonin etj. Ai ka thënë edhe se do të shkatërrojë të gjitha urat dhe termocentralet e Iranit. Trump alarmoi aleatët në fillim të këtij viti duke kërcënuar me përdorimin e forcës ushtarake kundër aleatit të NATO-s, Danimarkës, për shkak të kërkesës së tij për aneksimin e Grenlandës.